السبت، مارس ١٠، ٢٠٠٧

؟؟


و انا فى التلاتين
كان عمرى
يدوبك ست سنين
بسألنى
و بهرب من نفسى
الباقى راح فين

الخميس، ديسمبر ٢١، ٢٠٠٦

الحدق يفهم


بين المدور و المثلث
المستطيل كاد ينحرف
نفس اللسان اللى لعب
هو اللى جاى بيعترف
إنسان
و مفهوش غير لسان
و الكدب أخره بيتعرف

الثلاثاء، أكتوبر ٢٤، ٢٠٠٦

كل سنة و أنت .. لسه



كل سنة و انت مواطن
لسه بيتك فى المساكن
لسه آيل للسقوط
لسه فاضى
لسه ساكن
لسه برضه كل عام
يشبه الماضى تمام
باب مخلع
بس عينه
قاتلة جواك الكلام
تور فى ساقية
لسه باقية
و حسابات ..
و ازاى ؟
و كام ؟
لسه مش شايف مصيرك
لسه مش عارف تنام
لسه بيتنا هو بيتكوا
و الحراسة مشددة
لسه مسروق زرع غيطكوا
بين صحاب و بين عِدا
لسه مليون ألف لسه
و انت برضه مُصِر تنسى
كل سنة و عمار يا بيت
لسه ساكن فيك عبيط

الثلاثاء، أكتوبر ١٠، ٢٠٠٦

game over


قبل النهاية

ما تتكتب

نفسى أسالك

لسه الأميرة

بتنتظر

صوت الملك

و إلا الأميرة

و الملك

لعبة فى دنيا

بزمبلك

؟!

الاثنين، أكتوبر ٠٩، ٢٠٠٦

قلمين


قلمى اتقسم نصين
ف الحلم كان السؤال
حاير من بين شطين
و البحر كان المحال
.
.
خدت قلم و قولت
==========
ضاع الحلم
فى وسط ظروفى
رحت بكيت
على اطلال خوفى
قمت صرخت
فى وش العالم
بس صراخى
معداش جوفى
.
.
و اتعدلت بالتانى و رديت
==========
الحلم نابت
ما بين ضلوعك
و عوده لين
و ملك طوعك
اوعى الحروف
تصبح دموعك
تلقى السقوط
فى يوم طلوعك

السبت، أكتوبر ٠٧، ٢٠٠٦

goodbye


هربت عنينا من اللقا

و ضاع بريق اللؤلؤة

الحلم لو صار مستحيل

طب ححلمه أنا ليه بقى

جحش بدروين !!


إهداء إلى تمر حنة
**************
الهى يرقى راجل البيت
و يركب جحش فوق الجحش
و تبقى الأرنبة فى البيت
تجيب للدنيا مليون طحش
و نلقى الأرنب المذعور
راجع للبيت و لابس وحش
داخل ينطح و زى التور
لكن ف الجد مبيفلحش
!!

الأربعاء، أكتوبر ٠٤، ٢٠٠٦

توتو مات



مش عارف أكتب تفصيل
وكلامي لا دانتيل ولا تيل

شفت قماشة خضرة وزاهية
طلعت سودة وهم تقيل
جبت مازورة وقست حروفي
وناويت اتغلب على خوفي
حأكتب كلمة بالمقاسات
حزن وهم عشان توتو مات
توتو حيوصل بيا بسرعة
لما كلامي يخلد موته
بس الكلمة مهياش طالعة
أزاي امدح بس في توتو
توتو ده كان مسخ لفنان
مسخ وماسخ في الجرنان
ماسخ ماسك في التحرير
بيطبل ورا اي وزير
طول عمره ومقصه في أيده
بيفصل حرملة على سيده
ويقصقص بيه الأخبار
وبيقلب العتمة نهار
والغلبان يقرأ.. يتعلم
من غلبه يردد.. يتكلم
ويقول توتو ده قلبه علينا
شايف جوانا وحوالينا
وكبر توتو وصبح حوت
عجبه الكرسي ونسي الموت
جاله الموت من أقرب صاحب
سحب الكرسي وصاحبك شاحب
شاحب ساحب خيبته معاه
ورما القلة في ظهره وراه
نفس قماشة تفصيل كفنه
فصلّ منها لناس أدفنوا
بس الدايرة عشان مقفولة
طلعوا توتو جميل في الصورة
شكروا في توتو وايام توتو
وأن ده يوم تكريم يوم موته
عرضوا علىّ وظيفة ترزي
أمدح توتو مكان ماهو مرزي
واطبل للكرسي العالي
وازيف نغمات موالي
ومع الطبلة الكرسي يقرب
قلت يا واد ما تيلا تجرب

حفّـظت القلم المقاسات
برضك راح كاتب
توتو مات

من وحى بيرم و سرور"علامة "



الأولة نعم .. و الثانية لا .. و الثالثة آه
الأولة نعم .. أنعم علينا الله
الثانية لا .. كتبتها وياه
الثالثة آه .. قلبى كتم الآه
الأولة نعم .. أنعم علينا الله .. بأرض عمار
الثانية لا .. كتبتها وياه .. و عقلى أختار
الثالثة آه قلبى كتم الآه .. فى وسط النار
الأولة نعم .. أنعم علينا الله .. بأرض عمار .. و بعناها
الثانية لا .. كتبتها وياه .. و عقلى أختار .. حديث طه
الثالثة آه قلبى كتم الآه .. فى وسط النار .. يا محلاها
.
و منين أجيب ناس لمعنات الكلام فاهميين
عشان عيون الحبيبة
زرع الشباب بساتين
رووها بدماهم
و دموع فى قلب و عين
الكل حالم بالسكون
بين الجفون
يحلم بليلى
أو يكون
نجمة فى ليل ليلى
ينور بالأمل ليل السجون
و مدام فى قلبك سجن
فيا ريتنى من المساجين
ساكن ظلام جوفك
ده العزة فى حروفك
لما بترسم على العلم
دم الشـباب
فوق السحاب
و الأرض طين
.
ومنين أجيب ناس لمعنات الكلام فاهميين
أن التراب و الطين
بيغلوا فى القلوب
ويا السنين
الطين ده أصل الخلق
و الظلم زاد على الخلق
بس الجدورلسه معانقه التراب
و الفرع واصل للسحاب
مادد جسور
بتصرخ من آلام الخلق المحتاجين
يا اللى ربطوا الكمامة
علو صوتنا ده علامة
تلمع تنور الطريق
و تزيح قصادها أى شئ
توصل لباب مسجون برئ
شايلة الأمل ويا العلم
على طوق نجاه
لأجل الغريق

مين المسئول


بين السجان و الزنزانة
أحلامنا جعانة
و عطشانة
أحلام بتصول
و تجول
و تقول
مين المسئول ؟
فين القاتل ؟
ليه أنا مقتول ؟
!!

اصرخ بقى

و مادمت عارف
أن أنا عارف
طب سيبت ليه نفسك
تكون خايف
معنى سكوتك
يوم وجود صوتك
أن أنت أعمى
حتى لو شايف
!!

الثلاثاء، أكتوبر ٠٣، ٢٠٠٦

نور مقطوع


مانتيش فهمانى

و مش فاهمك

و لكن فى القلب

ساكن سهمك

إذا كنت جريمتى

إنى بحبك

بحق الحب

أنا بتهمك

جين سائد


الخوف

ده عادة

و الا مرض

ده وحش كاسر

ما فى حد ضده اعترض

كان فيه زمان

صنفين

شجاع و جبان

بس يا خسارة

الشجاع انقرض

!!

تقاليد بالية



إنسان

و طالب م الدنيا

إخلاء طرف

كان من زمن طيب

لكن شعوره انحرف

عاش طول حياته

راجل شريف

لاقى فى النهاية

معدش يجدى الشرف

!!

الأربعاء، سبتمبر ٢٧، ٢٠٠٦

بسم الله الرحمن الرحيم

بسم الله الرحمن الرحيم