كل سنة و أنت .. لسه
كل سنة و انت مواطن
لسه بيتك فى المساكن
لسه آيل للسقوط
لسه فاضى
لسه ساكن
لسه برضه كل عام
يشبه الماضى تمام
باب مخلع
بس عينه
قاتلة جواك الكلام
تور فى ساقية
لسه باقية
و حسابات ..
و ازاى ؟
و كام ؟
لسه مش شايف مصيرك
لسه مش عارف تنام
لسه بيتنا هو بيتكوا
و الحراسة مشددة
لسه مسروق زرع غيطكوا
بين صحاب و بين عِدا
لسه مليون ألف لسه
و انت برضه مُصِر تنسى
كل سنة و عمار يا بيت
لسه ساكن فيك عبيط
لسه بيتك فى المساكن
لسه آيل للسقوط
لسه فاضى
لسه ساكن
لسه برضه كل عام
يشبه الماضى تمام
باب مخلع
بس عينه
قاتلة جواك الكلام
تور فى ساقية
لسه باقية
و حسابات ..
و ازاى ؟
و كام ؟
لسه مش شايف مصيرك
لسه مش عارف تنام
لسه بيتنا هو بيتكوا
و الحراسة مشددة
لسه مسروق زرع غيطكوا
بين صحاب و بين عِدا
لسه مليون ألف لسه
و انت برضه مُصِر تنسى
كل سنة و عمار يا بيت
لسه ساكن فيك عبيط
posted by Mahmoud Serag @ ٦:٥٠ م
23 comments
23 Comments:
ليه المود ده طيب؟؟
أولا النص جميل جداً وسلس .. وبرغم إنى مش بفهم فى النقد كتير ولا فى العروض لكن حسيت إنه موزون
روح اليأس عالية جدا فى النص ده .. لكن أجمل ما فيه إنك غلفته بسخرية مريرة
كل سنة وأنت طيب
بإختصار
لله درك يا وطن
لله درك يا وطن
محمود :
شكرًا لزيارتك مدونتي
وبجد الكلمات حارقه وقاسية لانها حقيقية
تسلم
حلوة جدا جدا جدا يا سراج
بس افتكر ان كلمة طور بالطه
مش لاقي لازمة انك تكتبها بالته ياعني
ههههههه
ع العموم حلوة جدا
بالذات النهاية حلوة قوي
اجمد تهنئة قريتها الصراحة
حلوة فعلا
Violena
========
كل سنة و أنت طيبة
المود ده للإسف الحقيقة :(
سعيد بأن النص عجبك
على فكرة أن كمان مش دارس العروض و بوزن بودنى :)
و نورتى المودنة
nirfana
=======
شكراً نيرفانا و كل سنة و انت طيبة .
ادم المصري
==========
باشااااااا
:O
ميرسى جدا جدا جدا
و بالنسبة "للتور" انا رقيق الاحساس و المشاعر بقولها بالتاء لكن انت غليظ القلب بتقولها بالطاء :P
LAMIA MAHMOUD
=============
مرحب بالغالية
كل سنة و انت طيبة
و منورنى دايماً
ههههههههه
انا شايف ان مش كلام الكلام ينفع يبقي فيه رقة
لان كلمة رقيق بتاعتك دي .. لو علي طريقتك ممكن تكون
ركيك
هههههههه
واسمحلي .. ما حبش اقولهالك .. ولو حتي علي سبيل الهزار لانك برده حد مهم
تحياتي ليك
لو على سبيل الهزار أنا أقبلها منك
مش علشان أنا حد مهم علشان أنا بأعتبرك صاحبى و انا اللى بدأت الهزار فأكمله لنهايته بإبتسامة
:)
شكلى كده حاعمل "جلسة" أجيب فيها حد مبروك و أخد قصيدة لك "أتر" علشان أعرف انت مين .
:D
محمود: حلو جدا !!!! بجد عجبني أوي.. يا ريت نشوف حاجة تاني قريب
وبعدين ثور بالثاء أساسا.. تمشي تور تعني.. إنما طور دي صعبة شوية
:)
تحياتي
أيوا! ما هو دة إللي فالحين فيه
حبة المَسكَنة إللي واخدانا معاها لتحت
و مادام فيه إللي بنصعب عليه و بيتصدق ما نفضلش ليه مساكين ؟
يحط الإيد ع الخد مرّة ينوح و مرّة يمد إيده ، حسنة قليلة تمنع بلاوي كتيرة .. و اعطف عليّا يا سيدي البيه ..يبوس الأيادي و الأقدام
ما تعرفش ليه .. يا ترى كدة أضمن ؟
--
تعرف يا محمود ، كلامك دة موش عاوز يتنشر ، المفروض يتغنّى .. إيشمعنى العم نجم يعني ؟
..
(f)
.رون
عمر
===
منورنى و يا رب دائما شخابيطى تحوذ على إعجابك .
بإذن الله كل ما حاجة تطلع من الخلاط حاحطها على السفرة على طول
:)
بالنسبة للفظة " تور " و الاختلاف حولها مع صديقى "ادم المصرى" فالموضوع بيننا هزار و ليس أكثر ،
لاننا لو اتكملنا جد ، طبيعى نقول أن النطق فى الكتابتين سيكون واحد
كما أن العامية ليس لها معجم يمكن العودة إليه ، و أن الأصل فى الفصحى "ثور"
على كل حال يوم قال عمنا الكبير جاهين رباعيته :
أقلع غماك يا "تور" و أرفض تلف
أكسر تروس الساقية و أشتم و تف
قال بس خطوة كمان و خطوة كمان
يـ أوصل نهاية السكة يـ البير يجف
و عجبى
كتبت "تور" فى الرباعيات بالتاء و ليس بالطاء .
و لكنى كما قلت لك الأمر ليس أكثر من "مناكفاة" و هزار مع صديق أعتز به كثيراً .
تحياتى و سعيد بوجودك الذى أتمنى دوامه
شقلوطة
======
انت فين يا شقية؟
و لغيتى المدونة ليه ؟
أنا رحت عندك لاقيت المحل مقفول
قولت يمكن علشان العيد بقى و متفرغه لاكل الكحك و البسكويت
لازم تراجعى نفسك فى موضوع المدونة ده و ترجعى لنا تانى :)
و أنا عمال أقول اية الحكة اللى جت لى دى اتاركى أنت و سلمى بتقطعوا فروتى
حاعمل اية فى البرد ده من غير فروة بقى
:)
متشكر على الكلمتين الحلوين بتوع و الكلام الكبير عليا ده
مين قال عليك رغاية بس أمال انا يتقال عليا اية
:)
dرانيا
=====
متفق معاكى قلبا و قالبا فى كل اللى قوليته
المشى جنب الحيط خلنا بقينا احنا و الحيط جزء واحد
فتحول للمشى تحت الحيط
يعنى مدفونين بالحيا
"نجم" مرة واحدة لا طبعا فيه فرق كبير هو نجم و أنا سراج
انا بكل تأكيد أتمنى أن يتغنى لى حاجة بس الرك ع الملحن و المطرب اللى حيعذبوا الناس بكلامى
:)
ميرسى ليك كتيررررر
و كل سنة و أنت طيبة
سلمى
====
منورنى
أخبار الفشار على حسك اية
:)
بقى كده تبعينى فى أول محطة
ده أنا كنت عامل حسابى على انك انت اللى حتجيبى العيش و الحلاوة
عموما لو رحت ورا الشمس حابعت لك دعوة
:)
سعيد أن النص عجبك
و يا رب دايما
إيه ده!؟ إزاي كده وانا ما عرفش! ده كلام جميل جداً! القصيدة فعلا معظمها موزونة ووزنها جميل ولايق على كلامها ودمها خفيف جدا وفي نفس الوقت مش "مسطحة" زي الحاجات اللي الواحد متعود يخبط فيها ع النت
أحييك بجد.. القصيدة جميلة جداً وضمنت لك زبونة دائمة للمدونة
:))
حاجه تحزن وربنا !!
نفسى نصحى الصبح على فاجعه كده ان حصل انقلاب من اى نوع وفى اى حته و لاى حد
المهم نقول لمصر شفيتم:S
نص جميل يا سراج
و المدونة كلها ما شاء الله كل الشخابيط عجبتني
انما انا عندي سؤال بيلح في خاطري
بما انك يعني اسمك سراج فهل أفترض ان سروج دي عليها شدة؟
و لا انا غلطانة؟:D
برافو يا سروج
أحلى كلام اللى يخليك تفكر
ويدفعك عشان تتحرك
فعلا جميله
انت فين الغيبة طاااااااااااااالت
ايوة فعلا انت فين يا سراج؟؟
بندور عليك فى كل سكة و كل شارع
و ياريتك تبقى ساااامع ..صوتنا و ندااااانا
حلوة الأغنية دى؟
;D
يالا يا سراج..أرجع يا سررراج
شقلوطة
فى البداية اعتذار واجب عن الغيااااااااااب السخيف الذى طال لدرجة ربما جعلت العودة نفسها سخيف !
سامية
=====
مين ؟ فين؟ how ? الحقوووووونى
دفعة معنوية خلتنى انط من على الكرسى و اخبط فى السقف و مش عارف ارد أقول اية
بجد بجد شرف عضيم تشريفك
و كلامك ده عاوز ابروزه
ميرسى ليكى جدا جدا جدا
زعرورة
======
الانقلاب الوحيد اللى اجتمع عليه الشعب لحد دلوقتى كان ضد الفيفا علشان ابو تريكة مخدش احسن لاعب
عمار يا مصر
نمنماية
======
سعيد ان الشخابيط عجبتك
و فعلا سرّوج بالشدة
اصلى بدلعنى :)
وجع دماغ
=======
ميرسى و نورت البلوج
لميا و شقلوطة
ارد اقول اية بقى عليكوا
غير انا اسف
و مش حاعمل كده تانى
و حلوة الاغنية يا شقلوطة
إرسال تعليق
<< Home